أنا داليا، ومع صاحبتي وشريكتي ريهام، أسسنا نوري كرافت عشان نخلق مساحة بتحقق حلمنا، مكان بيجمع شغفنا بالأعمال اليدوية وخبرتنا العملية.

الحكاية بدأت لما قررت أقعد في البيت بعد أكتر من 10 سنين شغل، علشان أهتم بابني الأول. في الفترة دي، حسيت إن الدنيا اتغيرت فجأة، وشغفي اختفى وسط الروتين اليومي. كنت محتاجة حاجة ترجعني لنفسي، ولقيت اللي محتجاله في الأشغال اليدوية! فكرة إني أخلق حاجة بإيدي كانت بترجعلي شعور الإنجاز اللي كنت مفتقداه. فاكرة أول مرة خلصت قطعة بسيطة، وقد إيه حسيت بفخر وأنا شايفة النتيجة النهائية.

وقتها قلت لنفسي: ليه ما أجمعش اللي بحبه مع اللي بعرف أعمله؟ بما إن شغلي الأساسي كان إدارة مواقع إلكترونية، كانت الفكرة واضحة: أبدأ مشروعي الخاص اللي يعبر عني. وهنا بدأت نوري كرافت.

كنت خايفة جدًا من فكرة البدء من الصفر بعد ما كنت متعودة على حياتي العملية اليومية. بس حبي للشغل اليدوي كان دايمًا هو الدافع اللي بيخليني أكمل.”